100 في جامعة سلجوق
رح احكي عن طريقة الدراسة عن قسمين اول قسم هو طريقة دراستي انا :
كان نظام دراستي اهم شي فيو اني متفرغ ما كان عندي شي غير الدراسة ورغم هيك ما كنت ادرس ٢٤ ساعة كنت جاد بدراستي ما عمادرس مشان الاستاذ ما يبهدلني او مشان اهرب من شيئ معين كتير مهم يكون دافعك للدراسة هو انت ، يعني ما لازم يكون الدافع هو اهلك او استاذك او اي شي تاني لانو غير هيك رح توصل لنقطة وتمل وتتقاعس
كنت افيق الصبح مع اهلي بشكل طبيعي عالساعة ٩ لبين ما افطر وهيك لل١٠ بكون خلصت و رحت على مكان دراستي ما اقوم من هاد المكان الا مشان اكل او اصلي او يكون عندي درس البس واروح كانت راحتي شي كتير اساسي وراحت مخي اساسية اكتر .
صح كنت اقضي وقتي بمكان دراستي بس ما كنت ادرس كنت افتح الوظيفة او التيست اللي بدي احلو وابلش احل بضل بحل ما دام الاسئلة سهلة علي بس طلعلي سؤال صعب ما ببعتو لحدا وما بتخطاه بضل بحاول فيو اهم شي اثناء المحاولة بالسؤال انك تحرك القلم ما تستنى مخك يحلو وتجي انت تطبع افكارك لا كنت فكر على الورقة و جرب كل شي ما كنت ايأس بس كنت منتبه لمخي انو رح يجي وقت ويصير يكرر نفسو وقتها بتصير الدراسة والتفكير بلا فائدة وقتها باخد بريك ربع ساعة او عشر دقايق برجع لنفس السؤال غالبا كنت اول ما اجي الاقي حل و ينطبع الحل بمخي بحيث ما انساه ابدا.
كنت انتقل من الجبر للايكيو للهندسة بشكل تقديري بحيث اخلي ٦٠% من يومي ماث ٣٠% ايكيو ١٠%هندسة كل المواد بنفس الطريقة بالنسبة للطلعات والتسلاية كنت حاصرها بعد الدنمات اللي بعملهن بالمعهد او بعد الامتحانات مشان تغيير الجو وقت نومي كان نفسو عال١١ بوقف دراسة عال١٢ بنام .
انا درست عند استاذ بيحب يحفظنا كل قاعدة مهما كانت بس ما كانت هي طريقتي كنت اروح عالبيت اضل لحتى افهم كل تفصيلة بالدرس اللي اخدتو وبعدا ابلش اطبق اللي فهمتو .
وقت الامتحان قبلو باسبوع بثابر على الايكيو يوميا من اي مصدر ما بتفرق قبل الفحص ب٢٤ ساعة بفتح كتاب البوذا على القواعد بتصفحهن تصفح اذا عدا علي قاعدة ما بتذكرها ابدا بدرسها من اول وجديد غير هيك بتصفح تصفح بس والهندسة نفس الشي وبسكر عند المغرب وما برجع بفتح سيرة الدراسة بعمل اي شي بيسليني وبنام بكير وبحضر بوقت بكير عالفحص اثناء الفحص بحل عن تلت مراحل اول مرحلة بحل فيها الاسئلة اللي بينحلو من نظرة وبترك اللي بياخدو وقت واللي ما خطر عبالي فكرتهن بس اوصل لاخر سؤال بعبي ورقة الاجوبة برجع من الاول بحل اللي بيتطلبو وقت و بحاول شوي بالصعبين غالبا بينحل اكترهن بيبقى حوالي ٥ اسئلة برجع بعبي ورقة الاجوبة بعدين بركز على اللي ما نحلو وبحاول احلهن بالنسبة لاول شي ابدا فيو ما بيهمني ببلش من اول صفحة
تاني قسم عن طريقة الدراسة بشكل عام :
بعمرك ما تنسخ طريقة دراسة حدا وتطبقها وتتوقع انك تقدر تحصل علاماتو وتنجح نجاحو لانك شخص مختلف عنو تماما لهيك لا تتعب حالك وانت عمتجرب طريقة هاد وهاد . لكل طالب طريقتو الخاصة بالدراسة والفهم في طلاب بيستفادو اكتر اذا حفظو في طلاب اذا لخصو في طلاب اذا فهمو وفي طلاب بيستفادو اذا شرحو الفكرة لحدا وحتى في طلاب ما بتثبت الفكرة براسهن حتى طالب معين يشرحلن ياها .
قصة طريقة الدراسة كتير مهم انت السنة الجاية رح تصير طالب جامعة باذن الله لازم تكتشف طريقة الدراسة الانسب الك مشان تكون نقطة قوتك هي السنة والسنين الجاية . لهيك تروك اليوس ساعتين وبحاث كيف تعرف طريقة دراستك او قعود مع حالك وشوف انت بأي مواد من المدرسة كنت شاطر وشوف كيف كنت تدرسهن وغير طريقة دراستك لحتى تقدر تاخد النتيجة البدك ياها .
اخر شي بدي انبه لشغلة انو لازم تتقبل فرق القدرات بينك وبين غيرك مثلا انا كنت استوعابي سريع بس بقدر اركز بس ساعة رفيقي كان استوعابو ابطئ بس كان صبور لدرجة بتجنن كان بيقدر يدرس ٥ ساعات بشكل متواصل لانو ربنا عادل لما بياخد شي بيعوض بشي تاني ولا تقارن حالك بحدا قارن حالك بحالك وبس .
بالتوفيق ان شاءالله